புதிய வடிவமைப்பில் 10 ஆம் வகுப்பு தமிழ் 2 வினாத்தாள்

தமிழ் - இரண்டாம் தாள்
காலம்:2 1/2மணி                            பிரிவு - Ⅰ                                                                            மதிப்பெண்கள் : 100

                                          (மதிப்பெண்கள் :20)

                                                   பகுதி – 1

                          அனைத்து வினாக்களுக்கும் விடையளிக்க.

உரிய விடையைத் தேர்ந்தெழுதுக.                                                                               5×1=5

(1)  ஒருபொருட் பன்மொழிக்கு எடுத்துக்காட்டு

(அ)பாம்பு பாம்பு  (ஆ) மடமட  (இ) மீமிசை ஞாயிறு  (ஈ) சோறு உண்டான்.

(2)வினைத்தொகை பயின்று வந்துள்ள சொற்றொடரைத் தேர்ந்தெழுதுக.

(அ)அருவிலை  (ஆ) மடக்கொடி  (இ)உகுநீர்  (ஈ) வெஞ்சினம்.

(3)உரிச் சொற்றொடரைத் தேர்ந்தெழுதுக.

(அ)உறுவேனில்  (ஆ) நின்கேள்  (இ) நீர்முகில்  (ஈ) இரவுபகல்.

(4)பொதுமொழி அல்லாத சொல்லைத் தேர்ந்தெழுதுக.

(அ)எட்டு  (ஆ)செம்போத்து  (இ) வேங்கை  (ஈ) பலகை.

(5)கீழ்க்கண்டவற்றுள் பண்புத்தொகையைத் தேர்ந்தெழுதுக.

(அ)ஈன்குழவி  (ஆ) திண்டிறல்  (இ) உற்றநோய்  (ஈ) வாழ்க.

                                                                பகுதி – 2

கோடிட்ட இடங்களை நிறைவு செய்க.                                                                5×1=5

(6)ஒருபொருள் குறித்துவரும் சொற்களையே __________என்பர்.

(7)நன்னூல் கிடைக்குமா எனக் கடைக்காரரிடம் கேட்பது _________விடை.

(8)நண்பகல் என்பது ___________திணைக்குரிய சிறுபொழுது.

(9)மொழியமிழ்து – இவ்வுருவகத்துக்கான உவமை _________.

(10) மரவேர் என்பது ____________விகாரம் ஆகும்.

                                                                 பகுதி – 3

சுருக்கமாக விடையளிக்க                                                                                 10×1 = 10

(11)புரிந்த – இச்சொல்லிலுள்ள விகுதியை எடுத்தெழுதுக.

(12)கீழ்க்காணும் தொடரிலுள்ள ஒருமை பன்மைப் பிழைகளை நீக்கி எழுதுக.

இயங்குருப் படங்களைக் குழந்தைகள் விரும்பிப் பார்க்கின்றது.

(13)கீழ்க் காணும் தொடரிலுள்ள சந்திப்பிழைகளை நீக்கி எழுதுக.

ஆசிரியர் பெயரை தம் பெயருடன் சேர்த்து பீமாராவ் அம்பேத்கராக மாறினார்.

(14)கீழ்க்காணும் தொடரில் அமைந்துள்ள பிறமொழிச் சொல்லுக்குரிய தமிழ்சொல் எழுதுக.

                  பஜாரில் கூட்டம் ஜாஸ்தி.

(15)கீழ்க்காணும் தொடரிலுள்ள வழூஉச் சொற்களை நீக்கி எழுதுக.

                 குமார் காத்துக்காக தாவாரத்தில் படுத்து உறங்கினான்.

(16)கீழ்க்காணும் உரைப்பகுதிக்குப் பொருத்தமான நிறுத்தற்குறியிட்டு எழுதுக.

                வருக வணக்கம் இருவரும் இணைந்து வந்துள்ளீர்கள் என்ன செய்தி

(17)பொய்யா விளக்கு – இலக்கணக் குறிப்பு தருக.

(18)கீழ்க்காணும் மரபுத் தொடர் குறிக்கும் பொருள் யாது?

               இளங்கோவின் குடும்பத்தினர் வாழையடி வாழையாக, வேளாண்மைத் தொழில் செய்து வருகின்றனர்.

(19)நானிலம் – இத்தொகைச் சொல்லை விரித்தெழுதுக.

(20)இளமையில் கல் – இத்தொடரைச் செய்தித் தொடராக்குக.

                                                                  பிரிவு - Ⅱ

                                              (மதிப்பெண்கள் :10)

                              5வினாக்களுக்கு மட்டும் விடையளிக்க.                        5×2=10                                    

(21)அடுக்குத் தொடருக்கும்,இரட்டைக்கிளவிக்கும் உள்ள வேறுபாடு யாது?

(22)வினா எத்தனை வகைப்படும்? அவை யாவை?

(23)சிற்றோடை – பிரித்தெழுதிப் புணர்ச்சிவிதி தருக.

(24)சிறுபொழுதுஎத்தனை வகைப்படும்? அவை யாவை?

(25)ஆசிரியப்பாவின் பொது இலக்கணம் யாது?

(26)சொற்பின்வருநிலையணியை எடுத்துக்காட்டுடன் விளக்குக.

(27)செம்மொழி – பிரித்துப் புணர்ச்சி விதி தருக.

                                                                 பிரிவு - Ⅲ

                                               (மதிப்பெண்கள் : 50)

                                                                 பகுதி – 1

கீழ்க்காணும் வினாக்களுள் இரண்டனுக்கு விடையளிக்க                                 2×5=10

(28)கீழே உள்ள பாடலில் பயின்றுவரும் பாவகையைக் குறிப்பிட்டு,அதன் இலக்கணம் எழுதுக.

அறிந்தானை ஏத்தி அறிவாங் கறிந்து

சிறந்தார்க்குச் செவ்வ னுரைப்ப – சிறந்தார்

சிறந்தமை ஆராய்ந்து கொண்டு.

(29)வஞ்சப்புகழ்ச்சி அணி அல்லது உவமை அணியைச் சான்று தந்து விளக்குக.

(30)கீழ்க்காணும் குறட்பாவிற்கு அலகிட்டு வாய்பாடு தருக.

இடும்பைக்கு இடும்பை படுப்பர் இடும்பைக்கு

இடும்பை படா அதவர்.

                                                                   பகுதி – 2

எவையேனும் இரண்டனுக்கு ஒவ்வொன்றும் அரைப்பக்க அளவில் விடையளிக்க.2×5 =10       

(31)எம்.ஜி. இராமச்சந்திரனின் பிறப்பு மற்றும் நடிப்புத் துறையில் அவருக்குக் கிடைத்த வாய்ப்புப் பற்றி எழுதுக.

(32) அண்ணா எழுதிய கடிதத்தில் இடம்பெறும் கருத்துகள் நான்கினை எழுதுக.

(33)புகை – உங்களுக்குப் பகை. பேஷ்! இதை நீயே படிச்சுக் காட்டு.

       கமலநாதன் புன்னகை மறையத் துவங்கியது.

(அ)கமலநாதன் முகத்தில் புன்னகை மறைய கோகிலா கூறியதையும், அதற்கு அவர் கூறிய மறுமொழியும் யாவை?

                                                                      பகுதி – 3

(34) (அ) கீழ்க்காணும் பத்தியில் அமைந்துள்ள ஆங்கிலச் சொற்களைத் தமிழாக்கம்செய்க.3+2=5

ஆஸ்பத்திரியில் அவுட்பேசண்ட் வார்டில் டாக்டரைப் பார்த்தேன்.டாக்டர் பேசண்டுகளுக்கு மெடிசன் கொடுத்துக் கொண்டிருந்தார்.

(ஆ)கீழுள்ள அரபு எண்களைத் தமிழெண்களாக மாற்றுக.

87, 321, 405, 69.

(35) (அ) கீழ்க்காணும் ஆங்கில உரைப்பத்தியைத் தமிழாக்கம் செய்க.   3+2=5

                         Schools do not stop with teaching the children, the lessons alone do more .It is in the schools.That the boys and girls form some regular habits. They learn to behave in an orderly way. They are corrected whenever they go wrong.

(ஆ)கீழ்க் காணும் ஆங்கிலப் பழமொழிகளுக்கு இணையான தமிழ்ப் பழமொழிகளை எழுதுக.

1. Birds of the same feather flock together.

2. Prevention is better than cure.

                                                                        பகுதி – 4

கீழ்க்காணும் வினாக்களுள் ஒன்றனுக்கு விடையளிக்க.                                    5               

(36)(அ) கீழே கொடுக்கப்பட்டுள்ள கதையை நிறைவு செய்து பொருத்தமான தலைப்பை இடுக.

கீழ்வானம் சிவக்கத் தொடங்கியிருந்தது. பறவைகள் ஒலியெழுப்பியவாறே தத்தம் கூடுகளை விட்டுப் பறக்கத்தொடங்கின. அந்த விடியற்காலை நேரத்தில் திடீரென்று வானில் ஓர் ஒளி தோன்றியது.அப்போது_________________________________

                                                              (அல்லது)

கீழ்க் காணும் தலைப்பில்  8 வரிகளில் கவிதை ஒன்று எழுதுக.

பள்ளி அல்லது எழுதுகோல்.

                                                                         பகுதி – 5

(37) கீழ்க்காணும் பாடலின் திரண்ட கருத்தை எழுதி,அப்பாடலில் அமைந்துள்ள ஏதேனும் ஐந்து நயங்களை எடுத்தெழுதுக.                                                       5                                     

தமிழன் என்றோர் இனமுண்டு

தனியே அவர்க்கொரு குணமுண்டு

அமிழ்தம் அவனுடை மொழியாகும்

அன்பே அவனுடை வழியாகும்

மானம் பெரிதென உயிர்விடுவான்

மற்றவர்க்காகத் துயர்படுவான்

தானம் வாங்கக் கூசிடுவான்

தருவது மேல் எனப் பேசிடுவான்.

-       நாமக்கல் கவிஞர் இராமலிங்கம் பிள்ளை

      பகுதி – 6

(38)படிவம் நிரப்புதல்                                                                                                                           5 

                                                                       பகுதி – 7

(39) (அ) கீழ்க்காணும் வாழ்வியல் சூழலைப்படித்து விடையளிக்க            3+2=5                       

எழிலனும் தமிழரசனும் நெருங்கிய நண்பர்கள்.ஆனால் எழிலனுக்கு தமிழரசன் மட்டுமெ நண்பன். தமிழரசனுக்கோ வகுப்பில் மட்டுமின்றி பள்ளியிலும் அனைவரும் நன்பர்களே.பார்க்கும் யாவரிடத்திலும் அன்பாகவும் நட்பாகவும் பழகுவான்.பெரியவர்களிடமும் மரியாதையுடன் நடந்துகொள்வான்.தன்னால் முடிந்த உதவிகளும் செய்வான். எழிலனும் நல்ல மாணவன் தான். ஆனால் தானாகச் சென்று பழகமாட்டான்.வினாவுக்கு மட்டுமே விடை சொல்வான்.தமிழரசனிடம் எல்லோரும் நெருங்கிப் பழகுவது எழிலனுக்கு வேதனையைத் தந்தது.

Ⅰ.இவர்களுள் யாரைப்போல் இருப்பது நல்லது?

Ⅱ.தன்னிடம் அனைவரும் நெருங்கி பழகுவதற்கு எழிலன் என்ன செய்ய வேண்டுமென்று நீ நினைக்கிறாய்?

Ⅲ.உனக்கு நண்பர்கள் உண்டா? எத்தனை பேர்?

(ஆ)கீழ்க்காணும் சூழலைப்படித்து வினாக்களுக்கு நும் கருத்தை எழுதுக.

            விழிமாற்றுத் திறனாளி ஒருவர் சாலையைக் கடப்பதற்காக நெடுநேரமாக்க் காத்துக் கொண்டிருக்கிறார்.அந்த வழியாகப் பலரும் கடந்து செல்கின்றனர். ஆனால் அவருக்கு உதவ ஒருவரும் முன்வரவில்லை.

(ⅰ)இதுபோன்றதொரு சூழலில் நீ எவ்வாறு செயல்படுவாய்?

(ⅱ)பிறருக்கு உதவுவதால் வெளிப்படும் பண்பு யாது?

                                                                   பிரிவு - Ⅳ

                                               (மதிப்பெண்கள் :20)

                                                        பகுதி – 1

கீழ்க்காணும் வினாக்களுள் ஒன்றனுக்கு விடையளிக்க.                                                   10

(40)(அ)நும் ஊரில் குடிநீர் வசதி வேண்டி ஊராட்சி ஒன்றிய ஆணையாளருக்கு கூட்டு விண்ணப்பம் வரைக.    

(அல்லது)

(ஆ)நும் பள்ளி இலக்கிய மன்ற ஆண்டுவிழாவிற்கு வருகை தரும் புலவர் ஒருவருக்கு வரவேற்பு மடல் வரைக.

                                                                     பகுதி – 2

கீழுள்ள வினாக்களுள் ஏதேனும் ஒன்றனுக்குக் குறிப்புகளைக் கொண்டு ஒருபக்க அளவில் கட்டுரை எழுதுக.தலைப்பு ஒன்று தருக.                                                                          10

(41)(அ) கணினி – தோற்றம் – வளர்ச்சி –இணையம் –இணையதள வசதி- கணினி வழிக்கல்வி- கணினியின் வியத்தகு சாதனைகள் – பயன்படும் துறைகள் – உலகம் உள்ளங்கையில்.

                                                            (அல்லது)

(ஆ)பாரதியார் – பிறப்பும் இளமையும் – விடுதலை வேட்கை – தேசியக் கவிஞர் – முன்னறி புலவர்-சமுதாயத் தொண்டு- இறப்பு.   

                                                         --------------------------------

                                                           

08/02/2012

1. இந்தியாவுக்கு அளிக்கப்படும் நிதியுதவி தொடர, இங்கிலாந்துப் பிரதமர் டேவிட் கேமரூன் தலைமையிலான அரசு முடிவு செய்துள்ளதாகத் தகவல்கள் தெரிவிக்கின்றன.

2. கடந்த ஒரு வாரமாக நடந்துவரும் மக்கள் போராட்டத்தைத் தொடர்ந்து, மாலத்தீவு அதிபர் முகமது நஷீத் நேற்று பதவி விலகினார்.

3. சிரியாவில், ஏராளமான மக்கள் இராணுவத்தினரால் கொல்லப்படுவதைக் கண்டித்து, அங்குள்ள தூதரகத்தை அமெரிக்கா மூடிவிட்டது. இங்கிலாந்து, தனது தூதரைத் திரும்பப் பெற்றுள்ளது.

4. இராஜஸ்தான் மாநிலத்தின் பல்வேறு பகுதிகளில் கடுங்குளிர் நிலவுகிறது.  பிகானீர்,பிலானி ஆகிய இடங்களில் குறைந்தபட்ச வெப்பநிலையாக 3.5 டிகிரி செல்சியஸ் பதிவானது.

5. இந்தியா முழுவதும், 50 சி.பி.எஸ்.இ. பள்ளிகளில், சர்வதேசத் தரத்திலான படிப்புகள் அறிமுகம் செய்யப்படும் என மத்திய மனித ஆற்றல் மேம்பாட்டுத் துறை அமைச்சர் கபில் சிபல் தெரிவித்தார்.

6. மத்திய நிதி அமைச்சர் பிரணாப் முகர்ஜி, மத்திய நிதிநிலை அறிக்கையை, மார்ச்16 தேதி பாராளுமன்றத்தில் தாக்கல் செய்வார் என்றும், இரயில்வே பட்ஜெட், 14ஆம் தேதி தாக்கல் செய்யப்படும் என்றும், மத்திய அரசு அறிவித்துள்ளது.

7. தமிழகத்தில், மின்பற்றாக்குறை அதிகரிப்பால், மாநிலம் முழுவதும், அறிவிக்கப்பட்ட மின்வெட்டு, 8 மணி நேரமாக, இன்று முதல் உயர்த்தப்பட உள்ளது. 

8. செயற்கைக்கோள் உதவியுடன், கட்டடங்களைக் கண்காணித்து, சொத்து வரியைத் துல்லியமாக மதிப்பிடும் புதிய நடைமுறையைக் கொண்டு வர, சென்னை மாநகராட்சி திட்டமிட்டுள்ளது..

9.  2012-2013-ஆம் ஆண்டுக்கான நிதிநிலை அறிக்கை தயாரிப்பு குறித்த ஆய்வுக் கூட்டம் தமிழக முதல்வர்  தலைமையில்,தலைமைச் செயலகத்தில் நேற்று நடைபெற்றது.

10. கடந்த ஆண்டு ஏப்ரலில், உலகக் கோப்பை போட்டியின் இறுதி ஆட்டத்தில் விளையாடிய பின், முத்தரப்பு ஒரு நாள் மட்டைப்பந்துத் தொடரின் 2-ஆவது ஆட்டத்தில் இந்தியாவும், இலங்கையும், பெர்த்தில் இன்று விளையாடுகின்றன.

07/02/2012

1. ஈரான் மீது தாக்குதல் நடத்தும் திட்டம், இஸ்ரேலுக்கு இல்லை; வளைகுடா பகுதியில் மேற்கொள்ளப்படும் எந்த இராணுவ நடவடிக்கையும், எண்ணெய் விலை உயர்வுக்கு வழி வகுத்து விடும் என, அமெரிக்க அதிபர் ஒபாமா தெரிவித்துள்ளார்.

2. காஷ்மீருக்காக, இன்னொரு போரை பாகிஸ்தானால் தாங்க முடியாது என்று, காஷ்மீர் ஒற்றுமை தினத்தில், பாகிஸ்தான் பிரதமர் யூசுப் ராஸா கிலானி கூறினார்.

3. சிரியாவில் அரசுக்கு எதிராக போராட்டம் நடத்திவரும் பொதுமக்கள் மீது இராணுவம் தொடர்ந்து தாக்குதல் நடத்தி வருகிறது. 

4. மத்திய அரசின் வரவுசெலவுத் திட்டத்தில், தனிநபர் வருமான வரி விலக்கு வரம்பு ` 2 இலட்சமாக உயர்த்தப்படக்கூடும் என்று தெரிகிறது.

5. பயங்கரவாத நடவடிக்கைகளைத் தடுப்பதற்காக, அதிக அதிகாரம் கொண்ட தேசிய அளவிலான புதிய அமைப்பு, மார்ச் 1ஆம் தேதி உருவாக்கப்படும் என்று மத்திய அரசு அறிவித்துள்ளது.

6. பிரதமர் அலுவலகம், "டுவிட்டர்' சமூக வலைதளத்தில் இணைந்ததற்கு சிறப்பான வரவேற்புக் கிடைத்துள்ளதை அடுத்து, "பேஸ்புக்'கிலும் இணைவதற்கான நடவடிக்கை எடுக்கப்பட்டுள்ளது.

7.  அரசியலமைப்புச் சட்டத்துக்குப் புறம்பான, தவறான கொள்கை முடிவுகளை, நீக்கம் செய்வதற்கு, நீதிமன்றத்துக்கு அதிகாரம் உள்ளது என்று, உச்ச நீதிமன்ற முன்னாள் நீதிபதி ஏ.கே. கங்குலி கருத்து தெரிவித்துள்ளார்.

8.  மருத்துவப் படிப்பு படிக்கும் மாணவர்கள், கிராமங்களில் ஓராண்டு பணியாற்றுவதை, கட்டாயமாக்கும் திட்டம், விவாத அளவிலேயே உள்ளது என்று, இந்திய மருத்துவக் கவுன்சில் தலைவர் கூறினார்.

9.  தமிழ்நாடு அரசுப் பணியாளர் தேர்வாணையத்தில் (டி.என்.பி.எஸ்.சி.), முதல் முறையாக கலந்தாய்வு மூலம் பணி ஒதுக்கீடு செய்யப்பட்டுள்ளது.

10. முத்தரப்புத் தொடரின் அடுத்த ஆட்டத்தில், இர்பான் பதானுக்கு வாய்ப்பு அளிக்க வேண்டும் என, இந்திய அணியின் முன்னாள் தலைவர் கங்குலி கருத்து தெரிவித்துள்ளார்.

06/02/2012

1.  இலங்கை இனப்பிரச்னைக்கு, வெளிநாடுகள் கூறும் யோசனைகளை ஏற்கமாட்டோம் என்று, அந்நாட்டு அதிபர் மகிந்த ராஜபட்ச தெரிவித்தார்.

2.  அமெரிக்கப் பொருளாதாரம், உறுதியாகவும், வேகமாகவும் மீண்டெழுவதாக அதிபர் பராக் ஒபாமா தெரிவித்துள்ளார்.

3. ஈரான் மீது, அமெரிக்கா உள்ளிட்ட எதிரி நாடுகள் தாக்குதல் நடத்துவதற்கு, எந்த நாடாவது இடம் கொடுத்தால், அந்நாட்டின் மீது ஈரான் தாக்குதல் நடத்தும் என இராணுவம் எச்சரித்துள்ளது.

4. இதர பிற்படுத்தப்பட்டவர்கள் பட்டியலில் உட்பிரிவுகளை ஏற்படுத்த வேண்டும் என்று மத்திய சட்ட அமைச்சர் சல்மான் குர்ஷித் தெரிவித்துள்ளார்.

5.  புற்றுநோயால் பாதிக்கப்பட்டுள்ள ஏழை, எளியோருக்கு தன்னார்வத் தொண்டு நிறுவனங்கள் உதவ வேண்டும் என்று பிரதமர் மன்மோகன் சிங்கின் மனைவி குருசரண் கௌர் வலியுறுத்தினார்.

6. நமது நாட்டில் மகளிரை,துர்கா, காளி, லட்சுமி போன்ற தெய்வங்களுடன் ஒப்பிட்டு கவுரவிக்கிறார்களே தவிர, அவர்களுக்கு சுதந்திரம் அளிப்பதில்லை என, மத்திய மனிதவள மேம்பாட்டுத்துறை இணையமைச்சர் புரந்தேஸ்வரி, வேதனையுடன் தெரிவித்தார்.

7.  தைப்பூசத் திருவிழாவை முன்னிட்டு, பழனியில் இன்று திருக்கல்யாண வைபவமும், வெள்ளித் தேரோட்டமும் நடைபெறுகின்றன. இதைத் தொடர்ந்து, நாளை தைப்பூசத் தேரோட்டம் நடைபெறுகிறது.

8.மாவட்ட ஆட்சியர் அலுவலகத்தில், இலவசமாக மனு எழுதுவதன் மூலம், மக்கள் அன்றாடம் சந்திக்கும் பிரச்னைகளை அறிந்து கொள்ள,பாரதியார் பல்கலைக்கு உட்பட்ட கல்லூரிகளின், நாட்டுநலப் பணித் திட்ட மாணவர்களுக்கு நல்ல வாய்ப்பு ஏற்பட்டுள்ளது.

9.நம் நாட்டு மக்களுக்கு, அடுத்த 10 ஆண்டுகளில், 50 கோடி வீடுகள் தேவையென, இந்தியத் தொழிற்சாலை மற்றும் வர்த்தகக் கழக கூட்டமைப்பு தெரிவித்துள்ளது.

10. மழை காரணமாக டக்வொர்த் லூயிஸ் விதிப்படி 32 ஓவர்களாகக் குறைக்கப்பட்ட, முத்தரப்பு மட்டைப்பந்துத் தொடரின் முதல் ஆட்டத்தில், இந்தியாவை 65 ஓட்டங்கள் வித்தியாசத்தில் வெற்றி கண்டது ஆஸ்திரேலியா.

03/02/2012

1. சோமாலியா நாட்டின் தலைநகர் மொகாதீசுவில், புதிய தூதரை நியமிப்பது என்றும், அதற்கான புதிய தூதரகம் அமைப்பது என்றும் இங்கிலாந்து அறிவித்தது.புதிய தூதரகம் அமைக்கப்படும் வரை, தற்காலிகமாக,கென்யா நாட்டின் தலைநகர் நைரோபியில், இத்தூதரகம் செயல்படும்.

2.  தடை செய்யப்பட்ட இயக்கங்கள் மீது நடவடிக்கை எடுக்கும்படி பாகிஸ்தான் உள்துறை அமைச்சருக்கு பிரதமர் யூசுப் ரசா கிலானி உத்தரவிட்டுள்ளார்.

3. உள்நாட்டுப் போரின் போது நடந்த அத்துமீறல்கள் பற்றிய அறிக்கையை, ஐக்கிய நாடுகள் அவைக்கு அனுப்பப் போவதில்லை என இலங்கை அரசு கூறியுள்ளது.

4. இஸ்ரேலைத் தாக்கும் நோக்கில், 2 இலட்சம் ராக்கெட்டுகள், ஏவுகணைகள் உள்பட சுமார் 100 கிலோ எடை கொண்ட, யுரேனியம் செறிவூட்டப்பட்ட 4 அணு குண்டுகளை, ஈரான் தயாரித்துள்ளதாக, இஸ்ரேல் குற்றம்சாட்டியுள்ளது.

5. 2008-ம் ஆண்டு வழங்கப்பட்ட 122, 2ஜி அலைக்கற்றை உரிமங்களை

உச்ச நீதிமன்றம் வியாழக்கிழமை நீக்கம் செய்தது. 2ஜி அலைக்கற்றை ஒதுக்கீடு வெளிப்படையாக இருக்கவேண்டும் என்ற, பிரதமரின் அறிவுரை புறக்கணிக்கப் பட்டுள்ளது என்றும், சட்டத்துக்கு முரணான முறையில் அந்த உரிமங்கள் வழங்கப்பட்டுள்ளன என்றும் கடுமையாகச் சாடியுள்ளது.

6. ஊரக வேலை வாய்ப்பு உறுதித் திட்டத்தில் பணியாற்றுவோருக்கு 15 நாள்களுக்குள் சம்பளம் கொடுக்க வேண்டும் என, பிரதமர் கூறியுள்ளார்.

7.  தங்களுக்குச் செலுத்த வேண்டிய பாக்கியை செலுத்தாததால், இந்தியன் ஆயில் உட்பட மூன்று எண்ணெய் நிறுவனங்கள், ஏர் இந்தியாவுக்கு நேற்று எரிபொருள் தருவதை நிறுத்தின.  இந்தப் பிரச்னையால், ஏர் இந்தியா விமானங்கள் இயக்கத்தில் பாதிப்பு ஏற்பட்டது.

8.  புவி வெப்பமடைவதைத் தடுக்க வேண்டும் என்பதில் வளர்ச்சியடைந்த நாடுகளிடையே போதிய அக்கறையில்லை என்று பிரதமர் மன்மோகன் சிங் குற்றம் சாட்டினார்.

9. பாரதியார் பல்கலைக்கழகத்தில் ` 60 கோடியில் 5 மெகாவாட்  திறன் கொண்ட சூரிய ஒளி மின்னுற்பத்தி நிலையம் தொடங்க நடவடிக்கை எடுக்கப்பட்டு வருவதாக, துணைவேந்தர் சி.சுவாமிநாதன் தெரிவித்துள்ளார்.

10. இந்தியா, ஆஸ்திரேலிய அணிகள் மோதும் இரண்டாவது 20 ஓவர்கள் கொண்ட, மட்டைப்பந்துப் போட்டி இன்று மெல்போர்னில் நடக்கிறது. தொடர்ந்து வீழ்ச்சியை சந்தித்து வரும் இந்திய அணி, இம்முறை, முதல் வெற்றியைத் தேடி களமிறங்குகிறது.

02/02/2012

1.  சிரியாவில் நிலவி வரும் அரசியல் பிரச்னைக்கு பேச்சுவார்த்தை மூலமே தீர்வு காணப்பட வேண்டும் என்றும், இராணுவத் தீர்வு பலன் தராது என்றும், ஐக்கிய நாடுகள் அவையின் பாதுகாப்புக் குழுவில் இந்தியா வலியுறுத்தியுள்ளது.

2. சவுதி அரேபியாவில், ஆப்கானிஸ்தான் அரசுடன் பேச்சு நடத்தப் போவதாக, வெளியான தகவல்களை, தலிபான் அமைப்பு மறுத்துள்ளது.

3. இதுவரை, தென் சீனக் கடலில், தனது ஆதிக்கத்தை நிலைநாட்டுவதில் தீவிரம் காட்டி வந்த சீனா, தற்போது, கிழக்கு சீனக் கடலிலும், தனது தலையீட்டைத் துவக்கியுள்ளதற்கு ஜப்பான் கடும் கண்டனம் தெரிவித்துள்ளது.

4. தனியார் கூரியர் நிறுவனங்கள் மத்திய அரசுடன் தங்களைப் பதிவு செய்து கொள்வது கட்டாயமாக்கப்படும் என்று தொலைத் தொடர்புத் துறை அமைச்சர் கபில் சிபல் கூறியுள்ளார்.

5. ஈராஸ் என்ற 34 கிலோ மீட்டர் அகலமான, இரண்டாவது பெரிய விண்கல், செவ்வாய்க்கிழமை மாலை 4.30 மணியளவில் பூமியைக் கடந்து சென்றது.

6. குஜராத் கலவரம் தொடர்பாக, முதல்வர் மோடிக்கு, அழைப்பாணை அனுப்பி விசாரிக்கும்படி, நானாவதி கமிஷனுக்கு உத்தரவிடக் கோரி தாக்கல் செய்த மனுவை, அம்மாநில உயர்நீதிமன்றம் தள்ளுபடி செய்து விட்டது.

7. மேற்கு வங்கத்தில், காவல்துறை சங்கங்களுக்கு வழங்கப்பட்ட அங்கீகாரத்தை, அரசு நேற்று நீக்கியது. 

8. கன்னியாகுமரி சுற்றுவட்டாரப் பகுதிகளில் புதன்கிழமை வீசிய சூறைக்காற்றின் காரணமாக,கடல் சீற்றத்துடன் காணப்பட்டதால், திருவள்ளுவர் சிலைக்கு நாள் முழுவதும் படகுப் போக்குவரத்து நிறுத்தப்பட்டது.

9. கோவை மாநகராட்சியில் புதிதாக 3,443 பணியிடங்களைத் தோற்றுவிக்க, ஒப்புதல் அளிக்கக் கோரி,தமிழக அரசுக்கு மாநகராட்சி மன்றம் பரிந்துரை செய்துள்ளது.

10. ஆஸ்திரேலியாவுக்கு எதிரான முதல் இருபது ஓவர் மட்டைப்பந்து ஆட்டத்தில் 31 ஓட்டங்கள் வித்தியாசத்தில் தோல்வி கண்டது இந்தியா.

01/02/2012

1. பாகிஸ்தானின் பழங்குடியினப் பகுதிகளில், அமெரிக்கா, ஆளில்லா விமானத் தாக்குதல் நடத்தி வருவதாக, முதன் முறையாக, அமெரிக்க அதிபர் பராக் ஒபாமா வெளிப்படையாக ஒப்புக் கொண்டிருக்கிறார். 

2. இலங்கையில், தமிழர்கள் உள்ளிட்ட சிறுபான்மை இன மக்களுக்கு, அதிகாரம் தருவது குறித்த அரசியல் சட்டதிருத்தத்தை, அமல்படுத்துவது குறித்து, நாடாளுமன்றத் தேர்வுக் குழுவே முடிவு செய்யும் என அந்நாட்டு அதிபர் மகிந்த ராஜபட்ச தெரிவித்தார்.

3. உள்நாட்டுப் போரினால் பாதிக்கப்பட்டுள்ள லிபிய நாட்டுக்கு, இந்தியா, உயிர்காக்கும் மருந்துப் பொருட்கள், மருத்துவ உபகரணங்கள் உள்ளிட்ட ` 5 கோடி மதிப்பிலான, மனிதாபிமான உதவிகளை வழங்கியுள்ளது.

4.  நாடு முழுவதும் பொறியியல் படிப்பு மாணவர் சேர்க்கைக்கு பொது நுழைவுத் தேர்வை நடத்துவது குறித்து மத்திய அரசு பரிசீலித்து வருகிறது.

5. நிதி நெருக்கடியில் சிக்கித் தவிக்கும், மேற்கு வங்கம், கேரளா, பஞ்சாப் போன்ற மாநிலங்களுக்கு உதவும் வகையிலான, திட்டங்களை மத்திய அரசு முடிவு செய்துள்ளது.

6. முல்லைப் பெரியாறு அணை உறுதியாக உள்ளதா என்பதை, நேரில் ஆய்வு செய்ய, மத்திய அரசு அதிகாரிகள் வந்துள்ளனர்.

7. மத்திய அரசு ஊழியர்களுக்கான அகவிலைப்படி 7% உயர்த்தப்பட்டுள்ளது. கடந்த ஜனவரி 1ஆம் தேதியிலிருந்து இந்த உயர்வு கணக்கிடப்படும்.

8. புயலால் பாதிக்கப்பட்ட மாவட்டங்களுக்கு பிப்ரவரி 4ஆம் தேதி, யாரும் எதிர்பார்க்காத அளவுக்கு நிவாரண உதவிகளை அறிவிக்க உள்ளோம் என்று தமிழக முதல்வர் கூறியுள்ளார்.

9.  தமிழகத்தில் உள்ள 19 ஆயிரம் அரசுப் பேருந்துகளில், 9,389 பேருந்துகள் சாதாரண கட்டணத்தில் இயக்கப்படுவதாக,தமிழகப் போக்குவரத்துத் துறை அமைச்சர் செந்தில் பாலாஜி தெரிவித்தார்.

10. இந்திய-ஆஸ்திரேலிய அணிகளுக்கு இடையிலான இருபது ஓவர் மட்டைப்பந்துப் போட்டி , ஆஸ்திரேலியாவின் சிட்னி நகரில் புதன்கிழமை நடைபெறுகிறது.

31/01/2012

1. அமெரிக்கா - தென் கொரியா நாடுகளின் கூட்டு இராணுவப் பயிற்சி, அணு ஆயுதப் போரைத் தூண்டி விடும் என, வடகொரியா எச்சரித்துள்ளது. 

2.தென் அமெரிக்க நாடான பெருவில், நேற்று, ரிக்டர் அளவு கோலில் 6.3 புள்ளிகள் அளவு நிலநடுக்கம் ஏற்பட்டதில்,60 பேர் காயமடைந்தனர். 

3.ஜப்பானின் மக்கள் தொகை குறைந்து கொண்டே வருவதாகவும், 2060 ஆம் ஆண்டு, தற்போதைய மக்கள் தொகையில், மூன்றில் ஒரு பங்கு குறைந்து, 8 கோடியே 67 லட்சமாக ஆகி விடும் எனவும் அந்நாட்டு அரசு தெரிவித்துள்ளது.

4. பஞ்சாப் மற்றும் உத்தரகண்ட் மாநிலங்களுக்கான சட்டசபைத் தேர்தல், அசம்பாவிதங்கள் எதுவுமின்றி அமைதியாக நடந்து முடிந்தது. பஞ்சாபில் 80 விழுக்காடு வாக்குகளும், உத்தரகண்டில்,70 விழுக்காடு வாக்குகளும் பதிவாகின.

5.எந்த அரசு பதவியையும் வகிக்கக் கூடாது என, தனக்கும், மற்ற மூன்று விஞ்ஞானிகளுக்கும் அரசு சார்பில் விதிக்கப்பட்ட தடையை நீக்கவேண்டும் என, இஸ்ரோ முன்னாள் தலைவர் மாதவன் நாயர், பிரதமருக்குக் கடிதம் எழுதியுள்ளார். 

6. சங்க இலக்கியத்தில் பெருமை பெற்ற புறநானூற்றுப் பாடல்கள் அடங்கிய ஆங்கில மொழி பெயர்ப்பு நூல், திருவனந்தபுரத்தில் நடந்த விழாவில் சிறப்பாக வெளியிடப்பட்டது.

7. புயலால் ஏற்பட்ட பாதிப்பை போக்க, இடைக்கால நிவாரண நிதியாக ` 500 கோடி மத்திய அரசு வழங்கியதற்கு, தமிழக அரசு நன்றி தெரிவித்துள்ளது.

8.தானே புயலால் கடும் பாதிப்புக்கு உள்ளான கடலூர், மற்றும் விழுப்புரம் மாவட்டங்களில், `1000 கோடி செலவில், 1 லட்சம் வீடுகள் கட்டப்படும் என்று ஆளுநர் உரையில் தெரிவிக்கப்பட்டுள்ளது.

9. இன்றைய மாணவர்கள், எதிர்காலத்தில் முதியோர் இல்லங்களே இல்லாத நிலையை உருவாக்க வேண்டும் என, தமிழக வருவாய்த் துறை அமைச்சர் கே.ஏ.செங்கோட்டையன் வேண்டுகோள்.

10. சர்வதேச டென்னிஸ் மகளிர் இரட்டையர் தரவரிசையில், இந்தியாவின் சானியா மிர்சா, மிக அதிகபட்சமாக 7ஆவது இடத்துக்கு முன்னேறியுள்ளார்.

30/01/2012

1. சுற்றுச்சூழலில் ஏற்படும் மாசுகளைத் தடுப்பதிலும், இயற்கை வளங்களைப் பாதுகாப்பதிலும் இந்தியா 125-வது இடம் வகிப்பதாக யேல் பல்கலைக்கழகம் வெளியிட்டுள்ள அறிக்கையில் தெரிவிக்கப்பட்டுள்ளது.

2.  இந்தியா - பாகிஸ்தான் உறவு சுமுகமாக வேண்டியது மிகவும் அவசியம் என்று பாகிஸ்தான் பிரதமர் யூசுப்ரசா கிலானி கூறியுள்ளார்.

3. சிரியாவில், தலைநகர் டமாஸ்கஸ் நகருக்கு அருகில் உள்ள பகுதிகளை, எதிர்த்தரப்பினரிடம் இருந்து கைப்பற்றுவதற்காக, அதிபரின் இராணுவம் முழுவீச்சில் இறங்கியுள்ளது.

4.பஞ்சாப் மற்றும் உத்தரகண்ட் மாநில சட்டசபைத் தேர்தல்கள், பலத்த பாதுகாப்புடன் இன்று நடக்கின்றன. 

5.  மார்ச் மாதம் தாக்கல் செய்யப்படவுள்ள ரயில்வே பட்ஜெட்டில், சாதாரண வகுப்புக்கான கட்டணம் உயர்த்தப்பட மாட்டாது என தெரியவந்துள்ளது.

6.  ஊழலால் விளையும் தீமைகள் குறித்து, பள்ளிப் பாடநூல்களில் புதிய பாடத்திட்டங்களைப் புகுத்தி, மாணவ, மாணவியரிடையே ஊழல் குறித்தான விழிப்புணர்வை ஏற்படுத்த, மத்திய இலஞ்ச ஒழிப்பு ஆணையம் முடிவு செய்துள்ளது.

7. இந்திய, ஜப்பான் கடலோரக் காவல் படையினர் இணைந்து, சென்னை அருகே, நடுக்கடலில் கூட்டுப் பயிற்சி மேற்கொண்டனர். 

8.  வடலூரில், வள்ளலார் நிறுவிய சத்திய ஞானசபையில், 141வது தைப்பூச ஜோதி தரிசன விழா எதிர்வரும், 7ஆம் தேதி நடக்கிறது. 

9. ஆஸ்திரேலியாவுக்கு எதிரான டெஸ்ட் தொடரில் சரியாக விளையாடாமல், படுதோல்வி கண்டதன் எதிரொலியாக, டெஸ்ட் தரவரிசையில் பெரும் பின்னடைவைச் சந்தித்துள்ளனர் இந்திய வீரர்கள்.

10. ஆஸ்திரேலிய ஓபன் டென்னிஸ் போட்டியின், ஆடவர் ஒற்றையர் பிரிவில், செர்பியாவின் நோவக் ஜோகோவிச் பட்டத்தைத் தக்கவைத்துக் கொண்டார்.

                                                                

28/01/2012

1.  ஐ.நா., பாதுகாப்புக் கவுன்சிலை விரிவாக்க வேண்டும் என்ற, ஜி 4 நாடுகளின் பரிந்துரைக்கு, பல நாடுகள் ஆதரவளித்துள்ளதாக இந்தியா தெரிவித்துள்ளது. 

2. ஆப்கானிஸ்தானில் இருந்து பிரான்ஸ் படைகள் 2013-ம் ஆண்டு இறுதிக்குள் வெளியேறும் என அதிபர் நிகோலஸ் சர்கோஸி தெரிவித்துள்ளார். 

3. சர்வதேச அளவில் உயர்கொல்லி நோய்களால் பாதிக்கப்பட்டு சிகிச்சை தேவைப்படுபவர்களுக்கு உதவி செய்யும் வகையில் மைக்ரோசாப்ட் நிறுவனர் பில் கேட்ஸ், 750 மில்லியன் டாலர்களை அளித்துள்ளார்.

4.  பகவத் கீதை மத நூல் அல்ல ;அது வாழும் நெறி எனவும், சமூக நீதி காக்கும் நூல் எனவும் மத்திய பிரதேச உயர் நீதிமன்றம் கூறியுள்ளது. பள்ளிகளில் பகவத் கீதை கற்பிக்கும் மாநில அரசின் முடிவை எதிர்த்துத் தொடரப்பட்ட வழக்கில் உயர் நீதிமன்றம் இவ்வாறு தீர்ப்புக்கூறியுள்ளது.

5. இந்திய விமானப் படைக்காகத் தயாரிக்கப்பட்டுள்ள, இலகுரக ஆளில்லா போர்விமானம் லக்ஷயா-2 ,வெள்ளிக்கிழமை இரண்டாவது முறையாக வெற்றிகரமாகச் சோதனை செய்யப்பட்டது.

6. தானே புயலால் பாதிக்கப்பட்ட பகுதிகளில் மீட்பு மற்றும் நிவாரணப் பணிகளை மேற்கொள்ள முதல்வரின் பொது நிவாரண நிதிக்கு, இதுவரை ` 52.41 கோடி வழங்கப்பட்டுள்ளது.

7.  கூடங்குளம் அணுமின் நிலையம் 3 மாதங்களில் செயல்படத் தொடங்கும் என, இந்திய அணுசக்தி ஆணையத் தலைவர் ஸ்ரீகுமார் பானர்ஜி கூறினார்.

8. தஞ்சை மாவட்ட விவசாய பாசனத்துக்காக மேட்டூர் அணையில் இருந்து பிப்ரவரி 5ஆம் தேதி வரை தண்ணீர் திறந்துவிடப்படும் என்று முதல்வர் ஜெயலலிதா அறிவித்துள்ளார்.

9. நவீன தொழில்நுட்பங்களை உருவாக்குவதில் இந்தியா 6வது இடத்தில் உள்ளதாக ஜி.இ. நிறுவனத்தின் ஆய்வறிக்கையில் தெரிவிக்கப்பட்டுள்ளது.

10.அடிலெய்டில் நடைபெற்ற இறுதி மட்டைப்பந்துப் போட்டித் தொடரிலும் ஆஸ்திரேலியா வெற்றி பெற்றது.இத்தொடருடன் ராகுல் திராவிட் ஓய்வுபெறுவார் என நம்பப்படுகிறது.                                                           

Free Code Script