INTERNATIONAL DAY OF THE TROPICS 2026

 

சர்வதேச வெப்ப மண்டல தினம் — ஜூன் 29, 2026
(INTERNATIONAL DAY OF THE TROPICS)

வெப்ப மண்டலம்: பூமியின் உயிர்த்துடிப்பு

            பூமியின் இதயம் என்று அழைக்கப்படும் வெப்ப மண்டலப் பகுதிகளின் சிறப்பை உலகுக்கு உணர்த்தவும், அவை எதிர்கொள்ளும் சவால்களை முன்வைக்கவும் ஒவ்வோர் ஆண்டும் ஜூன் 29 அன்று சர்வதேச வெப்ப மண்டல தினம் கடைப்பிடிக்கப்படுகிறது.

            ஐக்கிய நாடுகள் சபை 2016-ஆம் ஆண்டு தீர்மானம் A/RES/70/267 மூலம் இந்நாளை அதிகாரப்பூர்வமாக அறிவித்தது. 2014 ஜூன் 29 அன்று வெளியிடப்பட்ட முதல் 'வெப்ப மண்டல நிலை அறிக்கை'யின் நினைவாக இந்நாள் தேர்ந்தெடுக்கப்பட்டது.

வெப்ப மண்டலம் என்றால் என்ன?

           
     வெப்ப மண்டலம் என்பது, புவியின் கடக ரேகைக்கும், மகர ரேகைக்கும் இடையே அமைந்துள்ள பகுதி. இப்பகுதி உலகின் மொத்த நிலப்பரப்பில் சுமார் 40% ஆகும். உலகின் உயிரினப் பல்வகைமையில் சுமார் 80% இங்கே காணப்படுகிறது. உலகின் சதுப்பு நிலக் காடுகளில் 95% இப்பகுதியில்தான் உள்ளன. இலத்தீன் அமெரிக்கா, ஆப்பிரிக்கா, தென்கிழக்கு ஆசியா, தென் ஆசியா, பசிபிக் தீவுகள் என்று பரந்து விரியும் இப்பகுதிகள் இல்லாமல் உலகின் இயற்கைச் சுழற்சியே சாத்தியமில்லை.

நம் தமிழ்நாடும் இந்த வெப்ப மண்டலத்தின் ஓர் அங்கம் என்பது நம் பெருமை.

நிலை அறிக்கையின் பிறப்பு

            2014 ஜூன் 29 அன்று வெளியிடப்பட்ட 'வெப்ப மண்டல நிலை அறிக்கை',  12 முன்னணி வெப்ப மண்டல ஆராய்ச்சி நிறுவனங்களின், 3 ஆண்டு கூட்டு முயற்சியின் விளைவு. இதை , மியான்மரின் நோபல் பரிசு பெற்ற அங் சான் சூயி அறிமுகப்படுத்தினார். இந்த அறிக்கை, சுற்றுச்சூழல், சமூகம், பொருளாதாரம் என்ற மூன்று கண்ணோட்டங்களில் வெப்ப மண்டலப் பகுதிகளை ஆய்வு செய்து, உலக கவனத்தை இங்கே திருப்பியது.

சவால்கள்: தொடரும் அச்சுறுத்தல்கள்

            வெப்ப மண்டலங்களில், காட்டை அழிப்பது, நகரமயமாதல், மக்கள்தொகைப் பெருக்கம், தட்பவெப்பநிலை மாற்றம் ஆகியவை கூட்டாக நெருக்கடியை அதிகரிக்கின்றன. 2050 ஆம் ஆண்டில் உலக மக்கள்தொகையின் பெரும்பகுதி வெப்ப மண்டல நாடுகளில் வசிக்கும், ஆனால் அதே நேரத்தில், இங்கே வறுமையும் ஊட்டச்சத்துக் குறைபாடும் அதிகமாக இருக்கும். வெப்ப மண்டலக் காடுகள் கார்பனை உள்வாங்கி, வானிலையை ஒழுங்குபடுத்தும் இயற்கை உள்கட்டமைப்பாகச் செயல்படுகின்றன. இவை அழியும்போது, அந்நாடுகளுக்கு மட்டுமல்லாமல், உலகம் முழுவதும் விளைவுகள் பரவுகின்றன.

நீதியின் குரல்

            காலநிலை மாற்றத்திற்கு மிகக் குறைவாக காரணமான வெப்ப மண்டல நாடுகளே, அதன் விளைவுகளை மிகவும் கடுமையாக அனுபவிக்கின்றன. இது ஓர் அநீதி ; ஓர் உலகளாவிய அக்கறையின்மை. இந்த ஏற்றத்தாழ்வை உணர்ந்து, உலகின் வல்லரசுகளும் பன்னாட்டு அமைப்புகளும் வெப்ப மண்டல நாடுகளுக்கு நிதி, தொழில்நுட்பம், கொள்கை ஆதரவு வழங்க வேண்டும்.

நாம் என்ன செய்யலாம்?

            சர்வதேச வெப்ப மண்டல தினம் வெறும் நினைவு தினம் மட்டுமல்ல — செயல்பாட்டு அழைப்பும்கூட. மரங்களை வளர்ப்பது, காடு அழிப்பை எதிர்ப்பது , நிலையான வாழ்க்கை முறையைக் கடைப்பிடிப்பது, இளையோருக்கு வெப்ப மண்டல உயிரினங்களின் முக்கியத்துவத்தைக் கற்பிப்பது — இவை எல்லாம் நம் அன்றாட வாழ்வில் நாம் செய்யக்கூடிய பங்களிப்புகள். 

                            #TropicsDay #DayOfTheTropics2026,             #DayOfTheTropics, #வெப்பமண்டலதினம்

என்ற சமூக ஊடகக் குறிச்சொற்களால் விழிப்புணர்வைப் பரப்பலாம்.

            இந்தியா, குறிப்பாக தமிழ்நாடு, வெப்ப மண்டலப் பகுதியின் அங்கமாக இருப்பதால் நம் மண்ணின் உயிர்ப்பைக் காக்கும் பொறுப்பு நமக்கும் உண்டு. சர்வதேச வெப்ப மண்டல தினம் நம்மை அந்தப் பொறுப்புணர்வுடன் விழிப்படையச் செய்யட்டும்.

 

National Statistics Day - JUNE 29

                         தேசிய புள்ளியியல் நாள் — ஜூன் 29, 2026

தோற்றமும் வரலாறும்

            இந்தியாவில் ஜூன் 29 அன்று தேசிய புள்ளியியல் நாள் கொண்டாடப்படுகிறது. இது புள்ளியியல் மேதை பேராசிரியர் பிரசாந்த சந்திர மகலனோபிஸ் அவர்களின் பிறந்தநாளை நினைவுகூரும் நோக்கில் அனுசரிக்கப்படுகிறது. இந்நாளை முதன்முதலில் 2007 ஆம் ஆண்டு அறிவிக்கப்பட்டது; பொதுமக்களிடையே — குறிப்பாக இளைய தலைமுறையினரிடையே — புள்ளியியலின் முக்கியத்துவத்தை உணர்த்துவதும், சமூக-பொருளாதாரத் திட்டமிடலில் தரவுகளின் பங்கை விளக்குவதும் இதன் முதன்மை நோக்கமாகும். 
      

2026 ஜூன் 29 அன்று கொண்டாடப்படுவது 20 ஆவது தேசிய புள்ளியியல் நாள் — ஒரு சிறப்புமிக்க மைல்கல்.

2026 கருப்பொருள்

            இந்த ஆண்டின் கருப்பொருள்: "நிலைத்த வளர்ச்சி இலக்குகளைக் கண்காணிப்பதற்கான தரவுகளின் ஒருங்கிணைப்பு" (Integration of Data for Monitoring Sustainable Development Goals — SDGs). ஐக்கிய நாடுகள் சபை நிர்ணயித்த 17 நிலைத்த வளர்ச்சி இலக்குகளை 2030 க்குள் எட்டுவதற்கு நம்பகமான, ஒருங்கிணைந்த தரவுகள் எவ்வளவு இன்றியமையாதவை என்பதை இக்கருப்பொருள் வலியுறுத்துகிறது. வறுமை ஒழிப்பு, பசி நீக்கம், உடல்நலம், கல்வி, பாலின சமத்துவம், சுத்தமான நீர், சுற்றுச்சூழல் பாதுகாப்பு — இவற்றை அளவிட்டு மதிப்பிட புள்ளியியல் ஒரு முக்கியக் கருவியாக விளங்குகிறது.

மகலனோபிஸின் பங்களிப்புகள்

            மகலனோபிஸ் 1893 ஜூன் 29 அன்று கொல்கத்தாவில் பிறந்தார். அவர் ஒரு விஞ்ஞானி, பொருளியல் அறிஞர், புள்ளியியல் நிபுணர் என்ற பன்முகத்தன்மை கொண்டவர். அவர் 1931 இல் கொல்கத்தாவில் இந்திய புள்ளியியல் நிறுவனத்தை *(ISI)* நிறுவினார் — இது பின்னாளில் தேசிய முக்கியத்துவமுள்ள நிறுவனமாக அறிவிக்கப்பட்டது. 1950 இல் தேசிய மாதிரி ஆய்வை (National Sample Survey) உருவாக்கி, இந்தியாவின் திட்டமிடல் மற்றும் கொள்கை வகுப்பின் முதுகெலும்பாக அதை மாற்றினார். இந்தியாவின் ஐந்தாண்டுத் திட்டங்களை வடிவமைப்பதிலும் அவர் முக்கிய பங்கு வகித்தார். 1968 இல் பத்ம விபூஷண் விருது பெற்றார். அவரது "மகலனோபிஸ் தூரம்" *(Mahalanobis Distance)* என்ற புள்ளியியல் அளவீட்டு முறை இன்றும் இயந்திர கற்றல் மற்றும் பகுப்பாய்வில் உலகளவில் பயன்படுத்தப்படுகிறது.

புள்ளியியலின் பயன்கள்

            புள்ளியியல்-  சுகாதாரம், கல்வி, வேளாண்மை, சுற்றுச்சூழல், மற்றும் பொருளாதாரத் திட்டமிடல் என்று அனைத்துத் துறைகளிலும் ஊடுருவியுள்ளது. துல்லியமான தரவுகளை வழங்குவதன் மூலம், கொள்கை வகுப்பாளர்களுக்கு திட்டங்களை உருவாக்கவும், கண்காணிக்கவும், வெற்றிகரமாக நடைமுறைப்படுத்தவும் உதவுகிறது. 
           

மக்கள்தொகைக் கணக்கெடுப்பு, விலையேற்றம் அளவிடல் ( CPI, WPI ), பருவமழை வரவு மதிப்பீடு, வேலையின்மை விகிதம் கணக்கீடு, மருத்துவ ஆராய்ச்சியில் மருந்து சோதனை முடிவுகள் மதிப்பீடு — இவை அனைத்தும் புள்ளியியலின் நேரடிப் பயன்பாடுகளே.

இன்றைய டிஜிட்டல் உலகில், தரவு "புதிய எண்ணெய்" என்று அழைக்கப்படுகிறது.

எனவே தரவுகளை சேகரிக்கவும், பகுக்கவும், விளக்கவும் தெரிவது ஒரு இன்றியமையாத திறமையாகிவிட்டது.

புள்ளியியல் தொடர்பான படிப்புகளும், வாய்ப்புகளும்

இந்தியாவில் பல்வேறு நிலைகளில் புள்ளியியல் படிப்புகள் உள்ளன.

இளங்கலை (B.Sc. Statistics) பெரும்பாலான பல்கலைக்கழகங்களில் கிடைக்கிறது.
 
முதுகலை (M.Sc. Statistics / M.Stat.) படிப்பிற்கு ISI கொல்கத்தா மற்றும் சென்னை கணித நிறுவனம் தலை சிறந்தவை.

பொருளாதாரம் + புள்ளியியல் இணைப் படிப்பு MoSPI மற்றும் RBI ஆகியவற்றில் வேலை வாய்ப்பு தரும்.

 
தரவு அறிவியல் மற்றும் பயன்பாட்டுப் புள்ளியியல் (Applied Statistics) படிப்புகளை IIT, IIM, IISER ஆகிய நிறுவனங்கள் வழங்குகின்றன.

அரசுப் பணியில் UPSC, SSC, RBI தேர்வுகள் மூலம் புள்ளியியல் அதிகாரி பதவிகளும் கிடைக்கின்றன.

இந்திய புள்ளியியல் நிறுவனம் (ISI) — மகலனோபிஸ் 1931 இல் நிறுவியது — இன்றும் புள்ளியியல் ஆராய்ச்சி மற்றும் கல்விக்கு உலகளாவிய மையமாக திகழ்கிறது.

எதிர்காலம் — தரவின் யுகம் 

 

"முடிவெடுப்பதில் தரவின் பயன்பாடு" என்பது அனைத்துத் துறைகளிலும் இன்றியமையாதது என்ற உண்மை இன்று நிரூபணமாகி வருகிறது. செயற்கை நுண்ணறிவு (AI), இயந்திர கற்றல் (Machine Learning), பெரும் தரவு (Big Data) ஆகியவை வளர்ந்துவரும் இன்றைய சூழலில் புள்ளியியல் அறிவு கொண்டவர்களுக்கு தொழில் வாய்ப்புகள் அபரிமிதமாக உள்ளன. புள்ளியியல் மற்றும் திட்டமிடல் அமைச்சகம் (MoSPI) ஆண்டுதோறும் கருப்பொருளுடன் கூடிய கொண்டாட்டங்களை ஏற்பாடு செய்கிறது; விருதுகள் வழங்கப்படுகின்றன; கட்டுரைப் போட்டிகளும் நடத்தப்படுகின்றன.

எதிர்காலச் செயல்பாடுகள்

எண்களற்ற உலகில் ஆட்சி இல்லை; ஆட்சியற்ற வாழ்க்கை இல்லை. மகலனோபிஸின் தொலைநோக்குச் சிந்தனை இன்றைய இந்தியாவை தரவு அடிப்படையிலான நாடாக வழிநடத்தியுள்ளது. நிலைத்த வளர்ச்சி இலக்குகளை 2030 க்குள் எட்டுவதில் ஒருங்கிணைந்த தரவுகளின் பங்கை இந்த 20ஆவது புள்ளியியல் நாள் மேலும் வலியுறுத்துகிறது. புள்ளியியல் என்பது வெறும் எண் கணக்கல்ல — அது நாட்டின் நாடித்துடிப்பை அளவிடும் கருவி. ஜூன் 29 — அந்த மேதையை நினைவுகூரும் நாள்; புள்ளியியலின் ஆற்றலை நாம் உணரும் நாள்.

ஜூலை 1 முதல்....

                 ஜூலை 1, 2026 முதல்...... 

1. ஆதார் மின்னஞ்சல் புதுப்பிப்பு — இலவசமாகிறது 

ஜூலை 1 முதல் டிசம்பர் 31, 2026 வரை , ஆதார் அட்டையில் மின்னஞ்சல் முகவரியை இணைக்கவோ திருத்தவோ ₹75 கட்டணம் தள்ளுபடி செய்யப்பட்டுள்ளது. இந்தச் சலுகை புதிய ஆதார் மொபைல் ஆப் மூலம் மட்டுமே பெற இயலும். Aadhaar Centre அல்லது myAadhaar portal வழியாக புதுப்பித்தால் வழக்கமான கட்டணம் தொடர்ந்து வசூலிக்கப்படும் என்பதை கவனத்தில் கொள்ள வேண்டும். 

பழைய mAadhaar ஆப் விரைவில் நிறுத்தப்படவுள்ளதால், Google Play Store அல்லது Apple App Store மூலம் புதிய Aadhaar ஆப்பை பதிவிறக்கிக் கொள்வது அவசியம்.
_____________________________________________________________________________________________

2. இந்திய ரயில்வே — புதிய அபராத விதிகள் 

Jan Vishwas (Amendment of Provisions) Act, 2026-ன் கீழ் Railways Act 1989-ன் Sections 137, 138 மற்றும் 162 திருத்தப்பட்டு, ஜூலை 1 முதல் பல்வேறு அபராதங்கள் உயர்த்தப்பட்டுள்ளன. 

டிக்கெட் இல்லாப் பயணம்: சரியான டிக்கெட் இல்லாமல் பயணித்தால் குறைந்தபட்ச அபராதம் ₹250-ல் இருந்து ₹500 ஆக இரட்டிப்பாகிறது. காலாவதியான அல்லது பிறருக்கு மாற்றப்பட்ட டிக்கெட்டில் பயணித்தாலும் இதே அபராதம் பொருந்தும். 

பெண்கள் / மாற்றுத்திறனாளிகள் பெட்டி: இவர்களுக்கென ஒதுக்கப்பட்ட பெட்டிகளில் அனுமதியின்றி பயணித்தால் ₹2,500 அபராதம் விதிக்கப்படும். Railway Protection Force தொடர்ந்து சோதனை நடத்தும்; மீண்டும் மீண்டும் விதிமீறல் செய்வோர் மீது சட்ட நடவடிக்கை எடுக்கப்படும். 

புகைப்பிடித்தல் / ரயிலில் வணிகம்: இவற்றிற்கு ₹2,000 அபராதம் விதிக்கப்படும்.

ஆபத்தான பொருட்கள்: தடைசெய்யப்பட்ட அல்லது அபாயகரமான பொருட்கள் கொண்டு செல்வதற்கு குறைந்தபட்சம் ₹10,000 அபராதம்.
-------------------------------------------------------------------------------------------------------

3. எல்பிஜி சிலிண்டர் — முக்கியமான விதி மாற்றம் 

மாதாந்திர விலைத் திருத்தம்: சர்வதேச கச்சா எண்ணெய் விலை நிலவரத்திற்கேற்ப ஒவ்வொரு மாதமும் 1-ஆம் தேதி வீட்டு உபயோக மற்றும் வணிக சிலிண்டர் விலைகள் மறுஆய்வு செய்யப்படும். 

ஒரு வீடு — ஒரே இணைப்பு:  May 25, 2026 அன்று திருத்தப்பட்ட LPG Amendment Order 2026-ன்படி, PNG (குழாய் எரிவாயு) இணைப்பு பெற்றுள்ள வீடுகள் , 30 நாட்களுக்குள் தங்கள் எல்பிஜி சிலிண்டர் இணைப்பை ஒப்படைக்க வேண்டும். Indane, HP Gas, Bharat Gas — மூன்றுக்கும் இது பொருந்தும். நிறுவனங்கள் ஏற்கனவே இரட்டை இணைப்பு வைத்துள்ள வீடுகளை கண்டறிந்து SMS அனுப்பி வருகின்றன.

                                      தவறான வதந்தி _ எச்சரிக்கை:                

"ஜூன் 30-க்கு பிறகு அனைவரின் சிலிண்டர் இணைப்பும் துண்டிக்கப்படும்" என்று சமூக ஊடகங்களில் பரவும் தகவல் முற்றிலும் தவறானது. PNG வசதி இல்லாத இடங்களில் வாழ்வோருக்கு LPG தொடர்ந்து கிடைக்கும்.
----------------------------------------------------------------------------------------------

4. வங்கி மற்றும் கிரெடிட் கார்டு மாற்றங்கள்: 

HDFC Regalia Gold கார்டு: முந்தைய காலாண்டில் குறைந்தது ₹60,000 செலவிட்டிருந்தால் மட்டுமே அடுத்த காலாண்டில் இலவச உள்நாட்டு விமான நிலைய லவுஞ்ச் அணுகல் (3 முறை) கிடைக்கும். சர்வதேச லவுஞ்ச் அணுகல் (Priority Pass மூலம் 6 முறை) மாறாது நீடிக்கும். 

YES Bank கிரெடிட் கார்டு: காலாண்டுக்கு ₹35,000 செலவு வரம்பு நிறைவேற்றப்பட்டால் மட்டுமே இலவச உள்நாட்டு லவுஞ்ச் அணுகல் கிடைக்கும். 

Citi கார்டு → Axis Bank மாற்றம்: ஜூலை 15-க்குள் Citi வங்கி கிரெடிட் கார்டுகள் முழுமையாக Axis Bank-க்கு மாற்றப்படும். கார்டு எண், PIN, CVV, billing cycle எல்லாம் மாறாது; வெகுமதிப் புள்ளிகள் Axis Bank தளத்தில் ஒருங்கிணைக்கப்படும். வட்டி விகிதங்கள் மட்டும் Axis Bank விதிகளுக்கு ஏற்ப மாறும்.
-------------------------------------------------------------------------------------------------------

 5. வருமான வரி (ITR) — ஜூலை 31 கடைசித் தேதி 

நேரடியாக ஜூலை 1 முதல் அமலாகும் விதி அல்ல என்றாலும், ஜூலை மாதத்தில் கவனிக்க வேண்டிய மிக முக்கியமான நிதிக் கடமை இது. 

FY 2025–26 (AY 2026–27)-க்கான வருமான வரி தாக்கல் கடைசி தேதிகள்:

1. சம்பளதாரர்கள் மற்றும் முதலீட்டாளர்கள் (ITR-1, ITR-2) — ஜூலை 31
2. தணிக்கை தேவையில்லாத தொழில் வருமானம் (ITR-3,ITR-4)- ஆகஸ்ட் 31
3. தணிக்கை தேவைப்படும் வணிக நிறுவனங்கள் — அக்டோபர் 31

• காலதாமதமான தாக்கல்களுக்கு ₹5,000 வரை தாமத அபராதம் (₹5 லட்சத்திற்கும் குறைந்த வருமானத்தினருக்கு ₹1,000) விதிக்கப்படும். 

• ஏப்ரல்–ஜூன் காலாண்டிற்கான TDS / TCS தாக்கல்களும் ஜூலை 31 தேதியுடன் இணைந்துள்ளன.

-------------------------------------------------------------------------------------------------------